“Dukore Twigire”: Umushinga mushya ugamije guhindura imibereho y’impunzi z’inkambi ya Kiziba n’abaturage bayikikije

Ku wa 15 Ukwakira 2025, Caritas Rwanda yatangije ku mugaragaro umushinga “DUKORE TWIGIRE” ugamije guteza imbere imiryango 598 y’impunzi n’abaturage baturiye inkambi ya Kiziba binyuze mu mahugurwa yo gukora imishinga ibyara inyungu, angana na miliyoni imwe y’amanyarwanda ku mugenerwabikorwa.

Nk’uko Caritas Rwanda yabitangaje inyuze ku rubuga rwayo rwa Youtube mu nkuru ivuga ku gikorwa cyo gutangiza ku mugaragaro umushinga DUKORE TWIGIRE mu Karere ka Karongi, uyu mushinga uzagera ku ngo 598 z’impunzi zituye mu Nkambi ya Kiziba mu Karere ka Karongi n’abaturage bahaturiye, mu rwego rwo kuzamura imibereho myiza yabo hashyirwa imbaraga mu kubaka ubudaheranwa no kwigira kw’impunzi n’abaturage baturiye inkambi, binyuze mu guteza imbere imibereho yabo, ubuzima budaheza no kongera ubushobozi. Ukaba ari umushinga uterwa inkunga n’Umuryango w’Ubumwe bw’Iburayi, ku bufatanye na World Vision Rwanda.

Umunyamabanga Mukuru Wungirije wa Caritas Rwanda, Padiri Emmanuel BAMPORINEZA yagize ti: “iki ni igihe kiza cyo kungurana iibitekerezo no gukomeza ubufatanye kugirango ibikorwa bizagire akamaro kandi birambe, duteza imbere imibereho y’abaturage dushinzwe kureberera; duhamya ko mu gushyira hamwe kwacu, dushobora guhindura ubuzima bw’imiryango ,kubongerera ikizere no gufasha abantu kwigira”.

Ni umushinga kandi uzakorera no mu zindi nkambi ukazatwara akayabo ka miliyoni 3 za amayero, Inkambi ya kiziba ikazafatamo angana na 28% y’umushinga wose, nkuko bisobanurwa na Bwana Jerome Sebaganywa, umuyobozi w’umushinga Dukore Twigire mu nkambi ya kiziba; ati: “ni mushinga mu gihugu cyose uzagera ku ngo 2133, tuzakorera mu nkambi enye iya Kigeme,Kiziba Mugombwa na Nyabiheke, ukazatwara miliyoni 3 z’amayero; inkambi ya kiziba ikazashobora kubona 28% by’uwo mushinga”.

Abagenerwabikorwa b’umushinga bakaba ari abakennye kurusha abandi, barimo 70% b’impunzi na 30% y’abaturage baturiye inkambi ya kiziba. Ari uzakora umushinga w’iterambere, ari uzakenera kubanza kwiga, nyuma agahabwa ibikoresho bizamufasha gutangira umushinga we, bose bazabona amafaranga miliyoni imwe y’amanyarwanda.

Uwari uhagarariye umuyobozi w’Akarere ka Karongi muri uyu muhango, Innocent Bihira ari we wafunguye ku mugaragaro uwo mushinga, yagize ati:”dufite urubyiruko, dufite imiryango ikennye, mu Karere kacu, uyu mushinga rero uzadufasha twivane mu bukene kandi bibe uruhererekane ruzatuma abaturage twese bitugeraho”.

Igikorwa cyo gutangiza kumugaragaro umushinga “DUKORE TWIGIRE” kikaba cyabereye I karongi, gihuza abahagarariye inzego z’ibanze, itsinda ry’abahagarariye impunzi z’inkambi ya Kiziba n’abashinzwe imibereho myiza.